پنڈی ٹیسٹ:پاکستان کا ٹاس جیت کر جنوبی افریقا کے خلاف بیٹنگ کا فیصلہ

راولپنڈی ، پاکستان نے جنوبی افریقا کے خلاف دوسرے اور آخری ٹیسٹ میچ میں ٹاس جیت کر پہلے بیٹنگ کرنے کا فیصلہ کیا ہے۔

راولپنڈی کرکٹ اسٹیڈیم میں کھیلے جا رہے میچ میں قومی ٹیم کے کپتان شان مسعود نے ٹاس جیت کر کہا کہ وکٹ بیٹنگ کے لیے موزوں ہے، اس لیے پہلے بیٹنگ کا فیصلہ کیا گیا ہے۔

شان مسعود کے مطابق آج کے میچ کے لیے ٹیم میں ایک تبدیلی کی گئی ہے حسن علی کو آرام دیا گیا ہے جبکہ آصف آفریدی کو ٹیم میں شامل کیا گیا ہے۔

39 سالہ آصف آفریدی نے اپنے کیریئر کا پہلا ٹیسٹ میچ کھیلتے ہوئے ڈیبیو کیا۔ انہیں شاہین شاہ آفریدی نے ٹیسٹ کیپ پیش کی۔ آصف آفریدی 39 سال اور 299 دن کی عمر میں ٹیسٹ ڈیبیو کرنے والے کھلاڑی بنے۔

دوسری جانب جنوبی افریقا کے کپتان ایڈن مارکرم نے کہا کہ اگر وہ ٹاس جیتتے تو بیٹنگ کا ہی فیصلہ کرتے۔ جنوبی افریقی ٹیم میں دو تبدیلیاں کی گئی ہیں کیشو مہاراج اور مارکو جینسن کو شامل کیا گیا ہے۔

واضح رہے کہ دو میچوں پر مشتمل ٹیسٹ سیریز میں پاکستان کو ایک-صفر کی برتری حاصل ہے۔ لاہور ٹیسٹ میں قومی ٹیم نے جنوبی افریقا کو 93 رنز سے شکست دی تھی۔

—