نادرا میں بھرتیوں کا اعلان،نئے دفاتر کے قیام کے لیے پلاٹس خریدنے کا فیصلہ

کراچی: نیشنل ڈیٹا بیس اینڈ رجسٹریشن اتھارٹی (نادرا) نے بڑی سطح پر بھرتیوں کے ساتھ ساتھ نئے دفاتر کے قیام کے لیے متعدد پلاٹس خریدنے کا فیصلہ کر لیا ہے۔

تفصیلات کے مطابق نادرا کراچی کے پانچ اضلاع اور اندرونِ سندھ کے 9 اضلاع میں 200 جونیئر ایگزیکٹیو (ڈیٹا انٹری اپریٹر) بھرتی کرے گی۔ بھرتیوں کے لیے امیدواروں کی تعلیمی قابلیت انٹرمیڈیٹ اور عمر کی حد 25 سال مقرر کی گئی ہے۔ واک اِن انٹرویوز 3 نومبر سے شروع ہوں گے۔

ذرائع کے مطابق نادرا سندھ کے 11 اضلاع میں پلاٹس خریدنے کا ارادہ رکھتی ہے، جن میں میرپور خاص، میرپور ساکرو، کوٹری، مٹیاری، چھاچھرو، جھڈو، میرپور ٹھورو، ٹنڈو الہیار، جامشورو، ٹھٹہ اور سجاول شامل ہیں۔

نادرا حکام کا کہنا ہے کہ نئی بھرتیاں عوامی سہولت میں بہتری اور ڈیٹا سروسز کو وسعت دینے کے لیے کی جا رہی ہیں۔