پاکستان سے جنگ نہیں ہونی چاہیے:ٹرمپ نے مودی کو خبردار کردیا

واشنگٹن: سابق امریکی صدر ڈونلڈ ٹرمپ نے انکشاف کیا ہے کہ انہوں نے بھارتی وزیراعظم نریندر مودی کو واضح طور پر کہا تھا کہ پاکستان سے جنگ نہیں ہونی چاہیے۔

اوول آفس میں دیوالی کی تقریب کے موقع پر صحافیوں سے گفتگو کرتے ہوئے ٹرمپ نے بتایا کہ ان کی بھارتی وزیراعظم سے ٹیلیفون پر تفصیلی بات چیت ہوئی، جس میں تجارت سمیت مختلف عالمی امور پر تبادلہ خیال کیا گیا۔

ٹرمپ نے کہا کہ انہوں نے اس گفتگو کے دوران مودی کو صاف طور پر بتادیا کہ پاکستان کے ساتھ کسی بھی قسم کی جنگ خطے کے لیے تباہ کن ثابت ہوسکتی ہے، اس لیے دونوں ممالک کو بات چیت اور تجارت کے ذریعے مسائل حل کرنے چاہییں۔

 

⚡️ Trump holds CALL with India’s PM Modi

‘Great conversation… talked about TRADE’

‘Let’s have NO WARS with Pakistan’ https://t.co/bP9wNC9j7g pic.twitter.com/vfCJo0jpOX

— RT (@RT_com) October 21, 2025

سابق امریکی صدر نے دعویٰ کیا کہ انہوں نے اپنے دورِ صدارت میں تجارت کے ذریعے آٹھ جنگیں رکوا دیں، جن میں پاک بھارت جنگ بھی شامل تھی۔ ان کے مطابق، پاک بھارت کشیدگی کے دوران انہوں نے دونوں ممالک کو فون کرکے متنبہ کیا تھا کہ اگر جنگ ہوئی تو امریکا دونوں سے تجارت ختم کر دے گا۔

ٹرمپ نے مزید بتایا کہ ان کی کال کے 24 گھنٹوں کے اندر دونوں ممالک نے رابطہ کرکے یقین دہانی کرائی کہ وہ جنگ نہیں کرنا چاہتے۔

انہوں نے کہا کہ یہ امریکی سفارت کاری کی ایک بڑی کامیابی تھی، جس سے نہ صرف جنوبی ایشیا بلکہ پوری دنیا میں امن کو فروغ ملا۔

یاد رہے کہ ٹرمپ اس سے قبل بھی متعدد مواقع پر یہ دعویٰ کر چکے ہیں کہ انہوں نے پاکستان اور بھارت کے درمیان ممکنہ جنگ کو روکنے میں اہم کردار ادا کیا۔