قاتل ڈور نے ایک اور گھر اجاڑ دیا،نعمان یوسف جاں بحق

لاہور: صوبائی دارالحکومت میں پتنگ بازی کے خونی کھیل نے ایک اور قیمتی جان لے لی۔ تھانہ نواں کوٹ کے علاقے میں ڈور پھرنے سے نوجوان جاں بحق ہوگیا۔

پولیس کے مطابق مزنگ کا رہائشی 21 سالہ نعمان یوسف موٹر سائیکل پر گھر واپس جا رہا تھا کہ اچانک گلے میں ڈور پھر گئی۔ شدید زخمی حالت میں اسے اسپتال منتقل کیا جا رہا تھا لیکن وہ راستے میں ہی دم توڑ گیا۔

پولیس کے مطابق جاں بحق نوجوان میڈیکل ریپ تھا اور اپنے گھر کا واحد کفیل تھا۔ مرحوم کے ایک چھوٹا بھائی اور دو بہنیں ہیں۔

دوسری جانب آئی جی پنجاب عثمان انور نے واقعے کا نوٹس لیتے ہوئے سی سی پی او لاہور سے رپورٹ طلب کر لی ہے جبکہ ڈی آئی جی آپریشنز کو پتنگ بازی میں ملوث عناصر کے خلاف سخت کارروائی کا حکم دیا گیا ہے۔