پی ٹی آئی کا عمر ایوب اور شبلی فراز کی نشستوں پر الیکشن لڑنے کا فیصلہ

پی ٹی آئی نے عمر ایوب اور شبلی فراز کی خالی نشستوں پر ضمنی انتخابات میں حصہ لینے کا اعلان کر دیا۔

چیئرمین پی ٹی آئی بیرسٹر گوہر نے کہا ہے کہ عمر ایوب کی خالی ہونے والی نشست پر ان کی اہلیہ انتخاب میں حصہ لیں گی۔ یہ فیصلہ بانی چیئرمین عمران خان نے کیا ہے۔

انہوں نے بتایا کہ عمر ایوب اور شبلی فراز کی نااہلی کے خلاف سپریم کورٹ میں چار درخواستیں دائر کی جاچکی ہیں، تاہم اب تک ان پر سماعت مقرر نہیں ہوئی۔

بیرسٹر گوہر کا کہنا تھا کہ اگر 30 اکتوبر سے قبل ان درخواستوں پر سماعت نہ ہوئی تو یہ مؤثر نہیں رہیں گی۔

ان کے مطابق شبلی فراز کی نشست پر الیکشن کا شیڈول 23 اکتوبر کو جاری ہوچکا ہے، امید ہے کہ عدالت ناانصافی نہیں ہونے دے گی اور جلد سماعت مقرر کرے گی۔