سموگ کا روگ پھیلانے والی گاڑیوں اور ٹرانسپوٹرز کے خلاف کریک ڈاون

لاہور ،دھواں چھوڑتی اور بغیر فٹنس سرٹیفیکٹ گاڑیوں کے خلاف ٹرانسپورٹ ڈیپارٹمنٹ کی غیر معمولی کارروائیوں پر رپورٹ جاری کر دی گئی جس کے مطابق رواں سال اب تک لاہور میں تقریباً 90 ہزار سے زائد گاڑیوں کا وہیکل انسپکشن اینڈ سرٹیفکیشن سسٹم اسٹیشنز سے معائنہ کیا گیا اور اس دوران معیار پر پورا اترنے والی 55 ہزار گاڑیوں کو فٹنس سرٹیفکیٹ جاری کیے گئے۔ دھواں چھوڑنے والی تقریبا 8 ہزار سے زائد گاڑیوں کا چالان جبکہ 5500 سے زائد گاڑیاں بند کی گئیں۔ بغیر فٹنس سرٹیفیکٹ کے چلنے والی 3500 سے زائد گاڑیاں بھی بند کی گئیں۔ علاوہ ازیں اوورلوڈنگ میں ملوث 14000 سے زائد گاڑیوں کے چالان جبکہ جاری کارروائیوں کے دوران مجموعی طور پر 8 کروڑ 50 لاکھ روپے کے جرمانے عائد کیے گئے۔مختلف خلاف ورزیوں پر 2200 گاڑیوں کے خلاف مقدمات درج جبکہ 1800 ڈرائیورز و گاڑی مالکان گرفتار کیے گئے۔ وزیر ٹرانسپورٹ بلال اکبر خان نے 24 گھنٹے دھواں چھوڑتی گاڑیوں کے خلاف کارروائی کی ہدایت کر رکھی ہے اور ایسی گاڑیوں کیساتھ کوئی رعایت نہ برتنے کا اظہار کیا ہے۔ ان کا کہنا تھا کہ سموگ کے تدارک کیلئے ضروری ہے کہ مالکان اپنی گاڑیوں کی بر وقت مرمت کروائیں۔۔ تمام اضلاع میں خلاف ورزی کرنے والوں کو سخت کارروائی کا سامنا کرنا پڑے گا۔ سموگ کا روگ جڑ سے اکھاڑنے کیلئے ہر ضروری اقدام اٹھایا جاتا رہے گا۔