وزیراعظم کل تین روزہ دورے پر سعودی عرب روانہ ہوں گے

وزیراعظم شہباز شریف سعودی ولی عہد محمد بن سلمان کی دعوت پر کل سعودی عرب کے تین روزہ سرکاری دورے پر روانہ ہوں گے۔

سرکاری اعلامیے کے مطابق وزیراعظم کے ہمراہ نائب وزیراعظم و وزیرِ خارجہ اسحاق ڈار اور کابینہ کے سینئر اراکین پر مشتمل وفد بھی سعودی عرب جائے گا۔

شہباز شریف 27 سے 29 اکتوبر تک ریاض میں ہونے والی مستقبل کی سرمایہ کاری کانفرنس (FII 9) میں شرکت کریں گے۔
کانفرنس کا موضوع "خوشحالی کی کنجی: ترقی کی نئی سرحدوں کا انکشاف رکھا گیا ہے، جس میں عالمی رہنما، سرمایہ کار، ماہرینِ معیشت اور پالیسی ساز شریک ہوں گے۔

وزیراعظم اپنے قیام کے دوران سعودی قیادت سے ملاقاتوں میں تجارت، سرمایہ کاری، توانائی، افرادی قوت سمیت علاقائی و عالمی امور پر تبادلہ خیال کریں گے۔
اس کے علاوہ وہ دیگر عالمی رہنماؤں اور بین الاقوامی تنظیموں کے سربراہان سے بھی ملاقاتیں کریں گے۔