مقبوضہ کشمیر میں آزادی کی روشن صبح ضرور طلوع ہوگی،وزیراعلیٰ پنجاب

وزیراعلیٰ پنجاب مریم نواز شریف نے یومِ سیاہ کشمیر کے موقع پر اپنے پیغام میں کہا ہے کہ کشمیر اور پاکستان لازم و ملزوم ہیں، کوئی انہیں جدا نہیں کر سکتا، مقبوضہ کشمیر میں آزادی کی روشن صبح ضرور طلوع ہوگی۔

انہوں نے کہا کہ 27 اکتوبر 1947 کو بھارت نے جموں و کشمیر پر غاصبانہ قبضہ کر کے تاریخ کا سیاہ ترین باب رقم کیا، آج بھی اس دن کی سیاہی بھارتی قیادت کے چہرے پر نمایاں ہے۔

مریم نواز نے کہا کہ مسئلہ کشمیر کسی ایک ملک کا نہیں بلکہ عالمی ضمیر کا امتحان ہے، پاکستان ہمیشہ کشمیری عوام کی اخلاقی، سیاسی اور سفارتی حمایت جاری رکھے گا۔

ان کا کہنا تھا کہ پاکستان نے آپریشن بنیان مرصوص میں بھارت کا غرور خاک میں ملا دیا، بھارتی قیادت اس شکست کے بعد وزیراعظم محمد شہباز شریف کا سامنا کرنے سے قاصر ہے۔

انہوں نے مزید کہا کہ امریکی صدر کی جانب سے وزیراعظم شہباز شریف اور فیلڈ مارشل حافظ عاصم منیر کی تعریف بھارت کے لیے ایک اور سیاسی ناکامی ہے۔

وزیراعلیٰ پنجاب نے کہا کہ کشمیری بھائیوں کے ساتھ ہیں اور ہمیشہ رہیں گے، لاکھوں شہداء کا خون ضرور رنگ لائے گا، اور آزادی کی صبح جلد طلوع ہوگی۔