بریسٹ کینسر سے آگاہی،قومی ٹیم کی پنک جرسی لانچ

اسلام آباد: پاکستان کرکٹ بورڈ (پی سی بی) نے بریسٹ کینسر سے آگاہی مہم کے تحت قومی ٹیم کی خصوصی پنک تھیم کٹ متعارف کرا دی۔

جنوبی افریقہ کے خلاف پہلا ٹی ٹوئنٹی میچ 28 اکتوبر کو راولپنڈی میں کھیلا جائے گا، جہاں پاکستانی کھلاڑی پنک جرسی پہن کر اس مہم میں حصہ لیں گے۔

پی سی بی کے مطابق امپائرز، گراؤنڈ عملہ اور کمنٹیٹرز بھی پنک ربن پہن کر اس سماجی مہم کی حمایت کریں گے۔
گورننگ باڈی کے چیف ایگزیکٹو سمیر احمد سید نے کہا کہ کرکٹ کی مقبولیت کو معاشرتی آگاہی کے لیے استعمال کرنا باعثِ فخر ہے، بروقت تشخیص بے شمار جانیں بچا سکتی ہے۔

میچ کے دوران سٹمپس پر پنک برانڈنگ کی جائے گی جبکہ گراؤنڈ کے اطراف آگاہی پیغامات بھی دکھائے جائیں گے۔
یہ پہلا موقع ہے کہ پی سی بی نے کسی بین الاقوامی میچ میں بریسٹ کینسر آگاہی مہم کو باضابطہ طور پر شامل کیا ہے۔ اس سے قبل “پنک ڈے” ایونٹس صرف پی ایس ایل کے دوران منعقد کیے جاتے تھے۔

سیریز کے دوسرے اور تیسرے ٹی ٹوئنٹی میچز 31 اکتوبر اور 1 نومبر کو لاہور میں ہوں گے، جبکہ تین ون ڈے میچز کی سیریز 4 سے 8 نومبر تک فیصل آباد میں کھیلی جائے گی۔