بغیر گرین سٹیکر گاڑیاں 15 نومبر کے بعد فوری بند

لاہور: ادارہ تحفظ ماحولیات پنجاب نے اعلان کیا ہے کہ 15 نومبر 2025 کے بعد بغیر گرین سٹیکر یا ای ٹی ایس سرٹیفکیٹ والی گاڑیاں سڑک پر نہیں چل سکیں گی اور ضبط کی جائیں گی۔

ڈی جی ماحولیات ڈاکٹر عمران حامد شیخ کے مطابق لاہور میں تمام گاڑیوں کے لیے ایگزاسٹ ٹیسٹنگ لازمی ہے، اور ماحولیات کے معیار پر پورا نہ اترنے والی گاڑیوں کے خلاف سخت کارروائی کی جائے گی۔

انہوں نے مزید بتایا کہ ای پی اے نے شہریوں کو خبردار کیا ہے کہ گاڑیوں کی ایگزاسٹ اور شور کی جانچ لازمی ہے، اور ماحول دشمن گاڑیوں کے خلاف زیرو ٹالرینس پالیسی نافذ ہے۔

ڈاکٹر عمران حامد شیخ کا کہنا تھا کہ ای پی اے پنجاب نے آلودگی کے خلاف سب سے سخت مہم کا آغاز لاہور سے کیا ہے، شہری فوری طور پر اپنی گاڑیوں کی ایگزاسٹ ٹیسٹنگ کروائیں، بصورت دیگر گاڑیاں قبضے میں لے لی جائیں گی۔