پاک افغان اختلافات مذاکرات کےذریعےپرامن طریقےسےحل کیاجائیگا،محسن نقوی

تہران: وفاقی وزیر داخلہ محسن نقوی نے ایران میں افغان نائب وزیر داخلہ ابراہیم صدر سے ملاقات کی اور کہا کہ پاکستان اور افغانستان کے درمیان اختلافات کو مذاکرات کے ذریعے پرامن طریقے سے حل کیا جائے گا۔ یہ ملاقات اقتصادی تعاون تنظیم (ای سی او) کے وزرائے داخلہ اجلاس کے موقع پر ہوئی۔

ایرانی ٹی وی سے گفتگو کرتے ہوئے محسن نقوی نے کہا کہ اختلافات تو گھروں میں بھی ہوتے ہیں، لیکن ہم برادر ممالک کی طرح انہیں بات چیت کے ذریعے حل کریں گے۔

اس سے قبل وزیر داخلہ نے ایرانی صدر مسعود پزشکیان سے بھی ملاقات کی۔ ایرانی صدر نے خطے میں کشیدگی کم کرنے اور کسی بھی تنازع سے بچنے کی ضرورت پر زور دیتے ہوئے کہا کہ ایران پاکستان اور افغانستان کے درمیان اختلافات کے حل کے لیے ہر ممکن تعاون کرے گا۔

https://x.com/ahmadwaraichh/status/1983214320193274092

ایرانی صدر نے مزید کہا کہ مسلم ممالک کو اپنے اتحاد اور بھائی چارے کو برقرار رکھتے ہوئے مشترکہ دشمنوں کے خلاف کھڑا ہونا چاہیے اور کشیدگی کم کرنے کی کوشش کرنا پیغمبر اسلام ﷺ کا واضح حکم ہے۔

اس موقع پر محسن نقوی نے کہا کہ اسلام آباد اور کابل کے درمیان تعمیری مذاکرات جاری ہیں اور پاکستان خطے کے ممالک کے درمیان کشیدگی بڑھانے کی اجازت نہیں دے گا۔