انگلینڈ کے شہر نارتھ یارکشائر میں پینے کے پانی پر پابندی

انگلینڈ کے ضلع نارتھ یارکشائر کے علاقے نِیڈرڈیل (Nidderdale) میں رہائشیوں کو ہدایت کی گئی ہے کہ وہ نلکے کا پانی کسی بھی صورت نہ پئیں، حتیٰ کہ اُبالنے کے بعد بھی نہیں، کیونکہ پانی کے نمونوں میں آلودگی کی نشاندہی ہوئی ہے۔

یارکشائر واٹر کمپنی کے ترجمان کے مطابق، ہیروگیٹ کے قریب 34 گھروں میں پانی میں کیمیائی اور طبعی تبدیلیاں دیکھی گئی ہیں۔ متاثرہ علاقوں میں ڈارلے، مینوتھ ہل، برسٹوتھ، ہائی برسٹوتھ، فاریسٹ مور، فیلزکلف اور لافٹ ہاؤس شامل ہیں۔

ترجمان نے بتایا کہ مزید 43 گھروں کے لیے اب بھی "اُبال کر پینے” کی ہدایت برقرار ہے، تاہم ان 34 گھروں کے مکینوں کو سختی سے کہا گیا ہے کہ وہ نلکے کا پانی پینے، کھانا پکانے، دانت صاف کرنے یا پالتو جانوروں کو پلانے کے لیے استعمال نہ کریں۔ البتہ پانی کو کپڑے دھونے، برتن صاف کرنے، غسل اور بیت الخلا کے لیے محفوظ قرار دیا گیا ہے۔

متاثرہ علاقوں کے رہائشیوں کو کمپنی کی جانب سے بوتل بند پانی فراہم کیا جا رہا ہے۔ ایک مقامی شہری نے بتایا کہ جمعے کی رات انہیں کمپنی کی جانب سے کال موصول ہوئی، جس میں آگاہ کیا گیا کہ پانی اُبالنے کے بعد بھی پینے کے قابل نہیں رہا۔ ان کے مطابق، ہفتے کے اختتام تک انہیں تقریباً 64 لیٹر پانی فراہم کیا گیا، تاہم اب تک آلودگی کی وجوہات واضح نہیں کی گئیں۔

یارکشائر واٹر کے ترجمان کا کہنا ہے کہ 10 اکتوبر کو معمول کے نمونے لینے کے دوران پانی میں کولِیفارم بیکٹیریا کی کم سطح پائی گئی تھی، جو ای کولی (E. coli) جیسے جراثیم کے گروپ سے تعلق رکھتا ہے اور بچوں، بوڑھوں اور کمزور افراد کے لیے خطرناک ہو سکتا ہے۔

کمپنی کے مطابق، نیٹ ورک کو صاف کرنے، حفاظتی وال نصب کرنے اور اضافی ٹیسٹ کرنے جیسے اقدامات کیے جا رہے ہیں۔ تازہ ٹیسٹوں میں کچھ علاقوں میں کیمیائی بے ترتیبی ظاہر ہوئی ہے، جس کے بعد متاثرہ گھروں کو سخت ہدایات جاری کی گئی ہیں۔

ترجمان نے مزید کہا کہ تحقیقات جاری ہیں اور ابتدائی شواہد سے معلوم ہوتا ہے کہ مسئلہ اُن دیہی علاقوں سے جڑا ہو سکتا ہے جہاں یارکشائر واٹر کے ساتھ نجی بور ہول سپلائی بھی موجود ہے۔ کمپنی نے صارفین سے تعاون پر شکریہ ادا کرتے ہوئے کہا کہ وہ جلد از جلد پانی کی فراہمی کو محفوظ بنانے کے لیے کام کر رہی ہے۔