عمران خان کی اپنے خلاف مقدمات یکجا کرنے کی درخواست عدم پیروی پر خارج

لاہور ہائی کورٹ نے بانی تحریک انصاف عمران خان کی اپنے خلاف درج تمام مقدمات کو یکجا کرنے کی درخواست عدم پیروی کی بنیاد پر خارج کر دی۔

سماعت کے دوران عمران خان کی جانب سے کوئی وکیل عدالت میں پیش نہیں ہوا۔ چیف جسٹس عالیہ نیلم نے پنجاب حکومت کے وکیل سے استفسار کیا کہ عمران خان پر کتنے مقدمات درج ہیں، جس پر بتایا گیا کہ ان کے خلاف 107 مقدمات درج ہیں۔

عدالت نے وکیل کی عدم موجودگی کے باعث درخواست کو خارج کر دیا۔

یاد رہے کہ عمران خان نے 2023 میں یہ درخواست دائر کی تھی جس میں مؤقف اختیار کیا گیا تھا کہ پنجاب کے مختلف شہروں میں درج مقدمات کو یکجا کیا جائے تاکہ کارروائی منصفانہ انداز میں آگے بڑھ سکے۔