انوارالحق کیخلاف تحریکِ عدم اعتمادیکم نومبرکو پیش کیےجانےکاامکان

مظفرآباد: وزیراعظم آزاد کشمیر چوہدری انوار الحق کے خلاف تحریکِ عدم اعتماد یکم نومبر کو پیش کیے جانے کا امکان ہے۔

ذرائع کے مطابق تحریکِ عدم اعتماد آج بھی پیش نہیں کی جا سکے گی اور اس عمل کو یکم نومبر تک مؤخر کر دیا گیا ہے۔

دوسری جانب پاکستان پیپلز پارٹی کی مرکزی قیادت نے 31 اکتوبر کو ایک اہم اجلاس طلب کر لیا ہے، جس میں پیپلز پارٹی آزاد کشمیر کی پارلیمانی پارٹی بھی شریک ہوگی۔ اجلاس کی صدارت چیئرمین بلاول بھٹو زرداری کریں گے۔ ذرائع کا کہنا ہے کہ پیپلز پارٹی کو تحریکِ عدم اعتماد کے لیے مطلوبہ ارکان کی حمایت حاصل ہے۔

ذرائع کے مطابق مسلم لیگ (ن) اور پیپلز پارٹی کے درمیان تحریکِ عدم اعتماد پر فارمولا طے پا گیا ہے۔ ادھر وزیراعظم چوہدری انوار الحق نے تحریکِ عدم اعتماد کا بھرپور مقابلہ کرنے کا فیصلہ کیا ہے۔

پیپلز پارٹی آزاد کشمیر کی پارلیمانی پارٹی کے اجلاس کے بعد تحریکِ عدم اعتماد باضابطہ طور پر جمع کرائی جائے گی۔

واضح رہے کہ وزارتِ عظمیٰ کے لیے چوہدری یاسین اور لطیف اکبر مضبوط امیدوار کے طور پر سامنے آئے ہیں۔