خیبر پختونخوا:سینیٹ کی خالی نشست پر ضمنی الیکشن، ووٹنگ جاری

خیبر پختونخوا میں سینیٹ کی خالی نشست پر ضمنی الیکشن کے لیے ووٹنگ جاری ہے۔ یہ نشست پی ٹی آئی رہنما شبلی فراز کے مستعفی ہونے سے خالی ہوئی تھی۔

پولنگ خیبر پختونخوا اسمبلی کے جرگہ ہال میں ہو رہی ہے، جہاں رکن اسمبلی احسان اللہ خان نے پہلا ووٹ کاسٹ کیا۔ الیکشن کمیشن نے صوبائی الیکشن کمشنر سعید گل کو ریٹرننگ افسر مقرر کیا ہے۔

ضمنی انتخاب میں مسلم لیگ (ن) کے حمایت یافتہ تاج محمد آفریدی اور پی ٹی آئی کے امیدوار خرم ذیشان کے درمیان مقابلہ ہے۔ اسمبلی میں مجموعی طور پر 145 اراکین موجود ہیں جبکہ کامیابی کے لیے 73 ووٹ درکار ہوں گے۔

خیبر پختونخوا اسمبلی میں حکومتی اتحاد کے اراکین کی تعداد 92 اور اپوزیشن کے اراکین کی تعداد 53 ہے۔

یاد رہے کہ گزشتہ روز سپریم کورٹ نے سینیٹ الیکشن روکنے کی درخواست مسترد کرتے ہوئے پشاور ہائیکورٹ کو شبلی فراز کی زیرِ التواء درخواست پر فیصلہ کرنے کی ہدایت کی تھی۔