بانی پی ٹی آئی کی ہدایات نظر انداز، کے پی میں 13 رکنی کابینہ تشکیل

پشاور: خیبر پختونخوا کی 13 رکنی صوبائی کابینہ کا حلف جمعہ کو گورنر کے پی نے لیا، جس پر تحریک انصاف کے بانی چیئرمین عمران خان کی ہدایات کو نظرانداز کیے جانے کے الزامات سامنے آئے ہیں۔

پارٹی ذرائع کے مطابق عمران خان نے صوبائی کابینہ کو 5 سے 8 ارکان تک محدود رکھنے کی ہدایت کی تھی اور کہا تھا کہ کابینہ سنگل ڈیجٹ سے زیادہ نہ ہو، تاہم نئے حلف بردار وزراء کی تعداد 13 رکھی گئی۔

ذرائع کے مطابق عمران خان نے اسد قیصر کے بھائی عاقب اللہ خان، شہرام ترکئی کے بھائی فیصل ترکئی اور سابق صوبائی وزیر شکیل خان کو کابینہ میں شامل نہ کرنے کی واضح ہدایات دی تھیں، لیکن ان کا احترام نہیں کیا گیا۔ اس کے برعکس، بانی چیئرمین نے کچھ سینئر پارٹی اراکین کو شامل کرنے کی ہدایت بھی کی تھی، جنہیں ماضی میں نظر انداز کیا گیا تھا۔

صوبائی وزیر مینا خان آفریدی نے وضاحت کی کہ عمران خان نے براہِ راست ہدایات جاری نہیں کی تھیں بلکہ پیغام بھیجا تھا کہ کابینہ مختصر رکھی جائے اور سہیل آفریدی اپنی کابینہ کا خود انتخاب کریں۔ انہوں نے کہا کہ کابینہ میں کسی بھی وقت ردوبدل ممکن ہے اور عمران خان کسی بھی وزیر کو شامل یا فارغ کر سکتے ہیں۔

انہوں نے مزید کہا کہ کابینہ میں سینئر اور تجربہ کار وزراء کے ساتھ نوجوانوں کو بھی اہم ذمہ داریاں دی گئی ہیں۔