وزیراعظم انوار الحق کے خلاف تحریک عدم اعتماد مسلسل تاخیر کا شکار

وزیراعظم آزاد کشمیر کے خلاف تحریک عدم اعتماد میں تاخیر، اگلے 4 روز تک پیش ہونے کا امکان نہیں

آزاد کشمیر کے وزیراعظم چوہدری انوار الحق کے خلاف تحریک عدم اعتماد مسلسل تاخیر کا شکار ہے اور ذرائع کے مطابق آج بھی یہ پیش نہیں ہو گی۔

پیپلز پارٹی ابھی تک تحریک عدم اعتماد پیش کرنے کے حوالے سے حتمی فیصلہ نہیں کر سکی ہے، جبکہ فارورڈ بلاک سے شامل ہونے والے اراکین اسمبلی بھی صورتحال پر پریشان ہیں۔ بعض اراکین نے پیپلز پارٹی میں شمولیت کو جلد بازی قرار دیا ہے اور حلقوں میں کارکنوں کو کیا جواب دینا ہے، اس حوالے سے قیادت سے رہنمائی مانگ رہے ہیں۔

ذرائع کا کہنا ہے کہ بلاول بھٹو زرداری ہی تحریک عدم اعتماد پیش کرنے کے حتمی فیصلے کا اختیار رکھتے ہیں، تاہم آئندہ 3 سے 4 روز تک تحریک پیش ہونے کے امکانات کم ہیں۔

خیال رہے کہ مسلم لیگ ن اور پیپلز پارٹی نے وزیراعظم چوہدری انوار الحق کے خلاف تحریک عدم اعتماد پر اتفاق کیا تھا، تاہم مسلم لیگ ن نے حکومت سازی میں پیپلز پارٹی کا ساتھ دینے سے انکار کر دیا ہے اور اپوزیشن میں رہنے کا فیصلہ کیا ہے۔