پیپلز پارٹی کے سینئر رہنما آفتاب شعبان میرانی انتقال کر گئے

کراچی: پیپلز پارٹی کے سینئر رہنما اور سابق وزیر اعلیٰ سندھ آفتاب شعبان میرانی نتقال کر گئے۔ ان کے انتقال کی تصدیق خود ان کے بیٹے نے کی۔ میرانی کراچی کے نجی اسپتال میں زیر علاج تھے اور ایک ہفتہ قبل انہیں اسپتال سے گھر منتقل کیا گیا تھا۔

ان کی نماز جنازہ ہفتے کی رات 10 بجے بیت الاسلام مسجد، ڈیفنس فیز فور میں ادا کی جائے گی جبکہ تدفین گزری قبرستان میں ہوگی۔

آفتاب شعبان میرانی کا تعلق شکارپور سے تھا اور وہ طویل عرصے سے کراچی میں مقیم تھے۔ انہیں پیپلز پارٹی کے سینئر ترین رہنماؤں میں شمار کیا جاتا تھا۔

صدر مملکت آصف علی زرداری نے میرانی کے انتقال پر تعزیت کا اظہار کرتے ہوئے کہا کہ وہ ذوالفقار علی بھٹو اور بے نظیر بھٹو کے قریبی رفقا میں سے تھے۔ وزیر اعلیٰ سندھ **سید مراد علی شاہ** نے بھی گزشتہ ہفتے ان کی کراچی کے نجی اسپتال میں عیادت کی تھی۔