پاکستان نے افغان طالبان ترجمان کا گمراہ کن بیان مسترد کر دیا

اسلام آباد: پاکستان نے افغان طالبان کے ترجمان کے استنبول مذاکرات سے متعلق بیان کو گمراہ کن اور حقائق کے منافی قرار دیتے ہوئے سختی سے مسترد کر دیا ہے۔

وزارتِ اطلاعات کے مطابق افغان ترجمان نے مذاکرات سے متعلق حقائق کو توڑ مروڑ کر پیش کیا، جبکہ پاکستان کا مؤقف واضح، مستقل اور ریکارڈ پر موجود ہے۔

بیان میں کہا گیا کہ پاکستان نے مذاکرات کے دوران افغانستان کی سرزمین پر موجود دہشتگردوں کی گرفتاری اور حوالگی کا واضح مطالبہ کیا تھا، افغان فریق کے الزامات اور بیانات مکمل طور پر جھوٹے اور بے بنیاد ہیں۔

وزارتِ اطلاعات نے واضح کیا کہ اگر افغانستان سنجیدہ ہے تو دہشتگردوں کی حوالگی سرحدی داخلی راستوں کے ذریعے ممکن بنائی جا سکتی ہے۔

ترجمان نے کہا کہ پاکستان کے خلاف غلط بیانی اور حقائق کو مسخ کرنے کی کوششیں ناقابلِ قبول ہیں۔

پاکستان نے افغان فریق کے متضاد دعووں کو مسترد کرتے ہوئے کہا کہ دہشتگردی کے مسئلے پر مؤقف میں کوئی تبدیلی نہیں آئی، اسلام آباد خطے میں امن و استحکام کیلئے سنجیدہ اور اصولی کوششیں جاری رکھے گا۔