لاہور تا راولپنڈی ریل کار کے نئے ریک کا افتتاح

پاکستان ریلوے نے لاہور سے راولپنڈی کے درمیان چلنے والی ریل کار کے نئے ریک کا باضابطہ افتتاح کر دیا۔ افتتاحی تقریب میں چیف ایگزیکٹو آفیسر ریلوے عامر علی بلوچ نے شرکت کی اور نئی بوگیوں کا معائنہ کیا۔

ریلوے حکام کے مطابق نئے ریک کو دشوار گزار راستوں پر چلانے کے لیے بوگیوں کو ری فربش کیا گیا ہے۔ مسافروں کی سہولت کے لیے کھانے پینے کی اشیاء، ابتدائی طبی امداد کی ادویات، اور صفائی ستھرائی کے بہترین انتظامات کیے گئے ہیں۔

افتتاحی موقع پر سی ای او عامر علی بلوچ نے کہا کہ مزید ٹرینوں میں بھی مسافروں کے لیے سہولیات فراہم کی جارہی ہیں۔ انہوں نے بتایا کہ ریل کا سفر آج بھی دیگر ٹرانسپورٹ کے مقابلے میں سستا اور محفوظ ہے اور مقصد مسافروں کو جلد اور بحفاظت منزل تک پہنچانا ہے۔

عامر علی بلوچ نے مزید کہا کہ لوکو موٹو اور ٹریکس کی مرمت جاری ہے جبکہ بین الاقوامی فنانسنگ کے ذریعے ٹریک کی اپ گریڈیشن بھی کی جا رہی ہے تاکہ مستقبل میں ٹرینوں کی رفتار اور سروس کے معیار میں مزید بہتری لائی جا سکے۔