افغانستان کے ہندوکش خطے میں شدید زلزلہ، 20 افراد جاں بحق،320 زخمی

افغانستان کے ہندوکش خطے میں شدید زلزلے کے جھٹکے محسوس کیے گئے، جس کے نتیجے میں 20 افراد جاں بحق اور 320 زخمی ہو گئے۔

خبر ایجنسیوں کے مطابق زلزلے کے جھٹکے مزار شریف سمیت متعدد شہروں میں محسوس کیے گئے، جب کہ مکانات کو بھی شدید نقصان پہنچا۔ زلزلے کے بعد لوگ خوف کے عالم میں گھروں سے باہر نکل آئے۔

فرانسیسی خبر رساں ادارے اے ایف پی کے مطابق آدھی رات کو شہری کھلے میدانوں کی طرف دوڑنے لگے کیونکہ انہیں خدشہ تھا کہ عمارتیں منہدم ہو سکتی ہیں۔

امریکی جیولوجیکل سروے (USGS) کے مطابق زلزلے کی شدت 6.3 اور گہرائی 28 کلومیٹر ریکارڈ کی گئی، جب کہ اس کا مرکز صوبہ سمنگان کے ضلع خُلم سے تقریباً 22 کلومیٹر جنوب مغرب میں تھا۔

میڈیا رپورٹس کے مطابق ہلاکتوں میں اضافے کا خدشہ ظاہر کیا جا رہا ہے کیونکہ کئی علاقے تاحال امداد کے منتظر ہیں۔

رپورٹس کے مطابق زلزلے کے جھٹکے ترکمانستان، تاجکستان، ازبکستان اور ایران میں بھی محسوس کیے گئے۔

واضح رہے کہ 31 اگست 2025 کو افغانستان میں 6.0 شدت کے زلزلے میں 2 ہزار سے زائد افراد جاں بحق ہوئے تھے، جب کہ 2023 میں 6.3 شدت کے زلزلے اور آفٹر شاکس کے باعث کم از کم 4 ہزار اموات واقع ہوئیں۔