یومِ شہدائے جموں پر آئی ایس پی آر کا نیا نغمہ ریلیز

 

آئی ایس پی آر نے یومِ شہدائے جموں کے موقع پر نیا نغمہ "کشمیر ہمارے خوابوں کی تعبیر” جاری کردیا۔ یہ نغمہ اہلِ کشمیر کی قربانیوں، عزم اور پاکستان سے ان کی لازوال وابستگی کو خراجِ عقیدت پیش کرتا ہے۔

نغمے میں کشمیری عوام کی جدوجہدِ آزادی، معصوم شہداء کی قربانیوں اور ظلم کے خلاف ان کے حوصلے کو اجاگر کیا گیا ہے۔

آئی ایس پی آر کے مطابق 6 نومبر کے سانحہ جموں سے لے کر آج تک کشمیری عوام نے اپنی آزادی کے لیے بے مثال قربانیاں دی ہیں اور تاریخ کو اپنے لہو سے روشن کیا ہے۔

نغمے کا مرکزی پیغام ظلم کے اندھیروں میں امید، استقامت اور آزادی کی روشنی ہے، جب کہ اس کے بول کشمیری عوام کے جذبۂ حریت اور پاکستان سے روحانی تعلق کی عکاسی کرتے ہیں۔

ترجمان پاک فوج کا کہنا ہے کہ کشمیر کے بہادر عوام آج بھی اس عہد پر قائم ہیں کہ ان کی منزل پاکستان اور مقدر آزادی ہے۔