پی آئی اےانجینئرز کااحتجاج،بین الاقوامی پروازوں کاشیڈول بری طرح متاثر

کراچی: پاکستان انٹرنیشنل ایئر لائن (پی آئی اے) کے ایئرکرافٹ انجینئرز کے احتجاج کے باعث قومی ایئر لائن کا بین الاقوامی آپریشن شدید متاثر ہوگیا۔

ذرائع کے مطابق ایئرکرافٹ انجینئرز اور پی آئی اے انتظامیہ کے درمیان تنازع شدت اختیار کر گیا ہے، جس کے نتیجے میں انجینئرز نے طیاروں کی کلیئرنس روک دی۔ اس صورتحال کے باعث گزشتہ رات 8 بجے کے بعد سے قومی ایئر لائن کی کم از کم 6 بین الاقوامی پروازیں روانہ نہیں ہو سکیں جبکہ مجموعی طور پر 12 پروازیں متاثر ہوئیں۔

متاثرہ پروازوں کے باعث مسافروں کو شدید مشکلات کا سامنا ہے، جن میں ایک بڑی تعداد عمرہ زائرین کی بھی شامل ہے۔ لاہور سے ابوظہبی اور اسلام آباد سے دمام و دبئی جانے والی پروازیں بھی متاثرہ پروازوں میں شامل ہیں۔

سوسائٹی آف ایئرکرافٹ انجینئرز کے مطابق وہ سی ای او پی آئی اے کے رویے کی تبدیلی تک کام نہیں کریں گے اور طیاروں کو اڑان کے لیے کلیئرنس نہیں دیں گے۔ انجینئرز کے مطابق وہ گزشتہ ڈھائی ماہ سے بازوؤں پر کالی پٹیاں باندھ کر پُرامن احتجاج کر رہے تھے لیکن انتظامیہ نے بات چیت سے گریز کیا۔

ترجمان پی آئی اے نے ردعمل میں کہا کہ سوسائٹی آف ایئرکرافٹ انجینئرز کی کوئی قانونی حیثیت نہیں ہے، ان کا مقصد قومی ایئر لائن کی نجکاری کے عمل کو سبوتاژ کرنا ہے۔ ترجمان کے مطابق پی آئی اے میں لازمی سروسز ایکٹ نافذ ہے اور کام چھوڑنا قانونی طور پر جرم ہے۔

انہوں نے بتایا کہ انتظامیہ نے متبادل انجینئرنگ خدمات دیگر ایئر لائنز سے حاصل کرنا شروع کر دی ہیں اور جلد تمام متاثرہ پروازیں روانہ کر دی جائیں گی۔