سکیورٹی فورسز کی بروقت کارروائیاں، دہشت گردوں کو دہائی کی بدترین شکست

اسلام آباد: سکیورٹی فورسز کی مؤثر اور بروقت کارروائیوں کے نتیجے میں دہشت گردوں کو گزشتہ دس برسوں کی سب سے بڑی ناکامی کا سامنا کرنا پڑا ہے۔

پاکستان انسٹیٹیوٹ فار کانفلکٹ اینڈ سکیورٹی اسٹڈیز (PICSS) کی تازہ رپورٹ کے مطابق اکتوبر 2025 میں ملک بھر میں دہشت گرد حملوں اور جانی نقصان میں نمایاں کمی ریکارڈ کی گئی۔

رپورٹ میں بتایا گیا ہے کہ اکتوبر کے دوران 355 دہشت گرد ہلاک ہوئے، جب کہ 72 سکیورٹی اہلکار اور 31 شہری شہید ہوئے۔ دہشت گرد حملوں کے باعث مجموعی جانی نقصان میں 19 فیصد کمی دیکھی گئی، جبکہ اگست کے مقابلے میں ستمبر کے دوران حملوں کی تعداد میں 52 فیصد کمی واقع ہوئی۔

رپورٹ کے مطابق سکیورٹی فورسز کے انٹیلی جنس بیسڈ آپریشنز، عزم، قربانی اور پیشہ ورانہ مہارت نے دہشت گرد نیٹ ورکس کو شدید نقصان پہنچایا ہے، جس سے ملک بھر میں امن و استحکام کے فروغ میں نمایاں پیشرفت ہوئی۔

ادارے نے اس رجحان کو دہشت گردی کے مکمل خاتمے اور پائیدار امن کی جانب ایک اہم سنگِ میل قرار دیا ہے۔