تربیلا ڈیم کی مٹی میں 636 ارب ڈالر مالیت کا سونا دریافت

پاکستان کی معیشت کے لیے حیران کن انکشاف سامنے آیا ہے۔ ایئر کراچی کے چیئرمین اور فیڈریشن آف پاکستان چیمبرز آف کامرس کے سابق نائب صدر حنیف گوہر نے دعویٰ کیا ہے کہ تربیلا ڈیم کی مٹی میں تقریباً 636 ارب ڈالر مالیت کا سونا موجود ہے۔

کراچی پریس کلب میں میڈیا سے گفتگو کرتے ہوئے حنیف گوہر نے بتایا کہ یہ معلومات باضابطہ طور پر آرمی چیف کو پیش کی جا چکی ہیں، جنہوں نے اس بریفنگ پر مثبت ردعمل دیا۔

ان کے مطابق غوطہ خوروں کی ٹیم نے تربیلا ڈیم کے اندر سے مٹی کے نمونے حاصل کیے جنہیں لیبارٹری میں جانچنے کے بعد ماہرین نے تصدیق کی کہ مٹی میں سونے کے ذرات موجود ہیں جن کی مجموعی مالیت 636 ارب ڈالر تک بنتی ہے۔

حنیف گوہر کا کہنا تھا کہ اس رقم سے پاکستان کا بیرونی قرضہ بھی ادا کیا جا سکتا ہے۔ انہوں نے بتایا کہ انہوں نے واپڈا کو پیشکش کی ہے کہ اگر وہ خود یہ منصوبہ شروع کرنا چاہیں تو ان کی کمپنی ہر ممکن تعاون کے لیے تیار ہے، بصورت دیگر ان کی ٹیم سرمایہ کاری کرکے سونا نکالنے اور حکومت کے حوالے کرنے کے لیے تیار ہے۔

انہوں نے مزید کہا کہ اس حوالے سے ہالینڈ، ایمسٹرڈم اور کینیڈا کے ماہرین سے بھی ابتدائی بات چیت ہو چکی ہے، اور اگر حکومت اجازت دے تو منصوبہ فوری طور پر شروع کیا جا سکتا ہے۔