سکیورٹی فورسز کا قلات میں آپریشن، بھارتی حمایت یافتہ 4 دہشت گرد ہلاک

 قلات: سکیورٹی فورسز نے بلوچستان کے ضلع قلات میں خفیہ اطلاع پر کارروائی کرتے ہوئے بھارتی حمایت یافتہ تنظیم سے تعلق رکھنے والے 4 دہشت گردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق آپریشن دہشت گردوں کی موجودگی کی اطلاع پر کیا گیا، جس میں فورسز نے دہشت گردوں کے ٹھکانے کو مؤثر انداز میں نشانہ بنایا۔ فائرنگ کے تبادلے میں 4 دہشت گرد مارے گئے، جن کے قبضے سے اسلحہ اور گولہ بارود بھی برآمد ہوا۔

آئی ایس پی آر کے مطابق ہلاک دہشت گرد کئی دہشت گردانہ کارروائیوں میں ملوث تھے۔
ترجمان پاک فوج نے کہا کہ علاقے میں مزید دہشت گردوں کی تلاش کے لیے کلیئرنس آپریشن جاری ہے۔

مزید کہا گیا کہ "عزمِ استحکام” کے ویژن کے تحت ملک بھر میں انسدادِ دہشت گردی آپریشنز بھرپور انداز میں جاری رہیں گے۔