ملک کے بالائی علاقوں میں برفباری، سردی کی شدت میں اضافہ

گلگت بلتستان اور خیبرپختونخوا کے سیاحتی علاقوں میں جاری برفباری سے سردی کی شدت میں مزید اضافہ ہوگیا ہے۔

گلگت بلتستان کے پہاڑوں پر برفباری کا سلسلہ دوبارہ شروع ہو گیا ہے، اور **بابوسر، نانگا پربت اور بٹوگاہ** کی چوٹیوں پر برفباری وقفے وقفے سے جاری ہے۔ اس دوران 12 سے زائد گاڑیاں برف میں پھنس گئی ہیں۔

خیبرپختونخوا کے سوات، دیر اور کالام کے پہاڑوں پر بھی برفباری ہوئی جبکہ اپر ہزارہ ڈویژن میں موسم سرما کی پہلی بارش اور ژالہ باری سے سردی میں اضافہ ہوا، اور دن کے وقت بھی سردی کا احساس غالب رہا۔ ایوبیہ، نتھیاگلی اور چھانگلہ گلی سمیت بالائی گلیات میں 2 سے 3 انچ تک برف پڑ چکی ہے۔

دوسری جانب مظفرآباد سے وادی نیلم تک بارش اور برفباری سے موسم مزید سرد ہوگیا ہے۔ انتظامیہ نے شہریوں کو ہدایت کی ہے کہ خراب موسم کے دوران غیر ضروری سفر سے گریز کریں۔

پروونشل ڈیزاسٹر منیجمنٹ اتھارٹی (پی ڈی ایم اے) نے خیبرپختونخوا کے مختلف علاقوں میں آج بھی وقفے وقفے سے بارش اور برفباری کی پیشگوئی کی ہے اور تمام اضلاع کی انتظامیہ کو پیشگی اقدامات کے حوالے سے الرٹ رہنے کی ہدایت کی گئی ہے۔