غزالہ ہاشمی امریکا کی پہلی مسلم نائب گورنر منتخب

امریکا میں ریاستی انتخابات کے نتائج سامنے آنے لگے ہیں، جن میں ورجینیا اور نیو جرسی میں ڈیموکریٹک پارٹی نے نمایاں کامیابی حاصل کی ہے۔

امریکی میڈیا کے مطابق، ورجینیا میں ڈیموکریٹس نے تاریخی فتح حاصل کرتے ہوئے پہلی بار خاتون گورنر منتخب کرالی۔ ایبی گیل اسپین برجر ورجینیا کی پہلی خاتون گورنر منتخب ہوئیں، جبکہ غزالہ ہاشمی نائب گورنر کے عہدے پر کامیاب ہو کر امریکا کی پہلی بھارتی نژاد مسلم خاتون نائب گورنر بن گئی ہیں۔

غزالہ ہاشمی اس سے قبل ورجینیا کی پہلی مسلم اور جنوبی ایشیائی نژاد خاتون سینیٹر بننے کا اعزاز بھی حاصل کرچکی ہیں۔

دوسری جانب، ریاست نیو جرسی میں بھی ڈیموکریٹ امیدوار میکی شیرل نے گورنر کا الیکشن جیت لیا۔ انہوں نے ری پبلکن امیدوار اور سابق رکن اسمبلی جیک چیٹریلی کو شکست دی۔

اسی دوران، نیو جرسی کے شہر جرسی سٹی میں پاکستانی نژاد امیدوار مصعب علی میئر کے عہدے کے لیے انتخاب لڑ رہے ہیں۔ لاہور میں پیدا ہونے والے مصعب علی بچپن میں والدین کے ہمراہ امریکا منتقل ہوئے تھے۔ نائن الیون کے بعد ان کے خاندان کو تعصب اور مشکلات کا سامنا کرنا پڑا، جس کے بعد وہ سماجی خدمات اور سیاست سے وابستہ ہوگئے۔

علاوہ ازیں، اٹلانٹا میں میئر کے انتخاب میں آندرے ڈکنز دوسری مدت کے لیے دوبارہ میئر منتخب ہوگئے ہیں۔