ایئر کرافٹ انجینئرز کے احتجاج سے 39 پروازیں تاخیر کا شکار

اسلام آباد: ایئر کرافٹ انجینئرز کے احتجاج کے باعث ملک بھر میں آج 39 پروازیں تاخیر کا شکار ہوگئیں۔

ایئر کرافٹ انجینئرز کی تنظیم کے صدر کے مطابق قومی ایئر لائن کے سی ای او کے رویے پر عملہ ناراض ہے جس کے باعث احتجاج جاری ہے۔

ترجمان قومی ایئر لائن نے واضح کیا ہے کہ فلائٹ آپریشن میں رکاوٹ برداشت نہیں کی جائے گی، جب کہ ایئر لائن کے سی ای او نے احتجاج میں شامل انجینئرز کے خلاف سخت کارروائی کے احکامات جاری کردیے ہیں۔

انتظامیہ کا کہنا ہے کہ قومی ایئر لائن میں لازمی سروسز ایکٹ نافذ ہے، اس لیے ہڑتال یا کام چھوڑنے کی صورت میں قانونی کارروائی کی جائے گی۔