راولپنڈی،ڈینگی مچھر کے حملے تیز، 24 گھنٹوں میں 20 نئے کیسز رپورٹ

راولپنڈی: ڈینگی مچھر کے حملے تھمنے کا نام نہیں لے رہے، شہر کے مختلف علاقوں میں مریضوں کی تعداد میں مسلسل اضافہ ہورہا ہے۔

ڈسٹرکٹ ہیلتھ اتھارٹی کے مطابق گزشتہ 24 گھنٹوں کے دوران 20 نئے مریض رپورٹ ہوئے ہیں، جب کہ شہر کے اسپتالوں میں اس وقت 31 افراد زیر علاج ہیں۔ خوش قسمتی سے ڈینگی سے کسی قسم کی اموات رپورٹ نہیں ہوئیں۔

اعداد و شمار کے مطابق رواں سال اب تک 21 ہزار 440 افراد کی اسکریننگ کی جاچکی ہے، جن میں سے 1409 مریضوں میں ڈینگی کی تصدیق ہوئی ہے۔ ڈی ایچ او ڈاکٹر جواد کے مطابق انسدادِ ڈینگی مہم کے تحت ویکٹر سرویلنس ٹیمیں سرگرم عمل ہیں۔

ہیلتھ اتھارٹی کے مطابق 1361 ٹیموں نے 62 لاکھ 73 ہزار 989 گھروں کی چیکنگ مکمل کی ہے، جن میں سے 2 لاکھ 4 ہزار 641 گھروں میں لاروا کی موجودگی پائی گئی۔ مزید بتایا گیا کہ 17 لاکھ 94 ہزار 718 مقامات میں سے 2 لاکھ 32 ہزار 874 جگہوں پر بھی لاروا برآمد ہوا۔

ڈینگی ایس او پیز کی خلاف ورزی پر کارروائیاں جاری ہیں۔ اب تک 4764 ایف آئی آرز درج، 1923 مقامات سیل اور 3657 چالان کیے جاچکے ہیں، جبکہ 11 لاکھ روپے سے زائد کے جرمانے عائد کیے گئے ہیں۔

ضلعی انتظامیہ نے شہریوں سے اپیل کی ہے کہ وہ صفائی ستھرائی اور احتیاطی تدابیر پر سختی سے عمل کریں تاکہ ڈینگی کے پھیلاؤ کو مؤثر طور پر روکا جا سکے۔