چین سے دوستی پاکستان کی خارجہ پالیسی کا بنیادی ستون ہے،صدر زرداری

صدرِ مملکت آصف علی زرداری نے کہا ہے کہ چین سے دوستی پاکستان کی خارجہ پالیسی کا بنیادی ستون ہے اور چین نے ہمیشہ ہر مشکل وقت میں پاکستان کا بھرپور ساتھ دیا ہے۔

دوحہ میں صدر آصف علی زرداری اور چین کے نائب صدر ہان ژنگ کے درمیان ملاقات ہوئی، جس میں باہمی تعلقات، سی پیک کے دوسرے مرحلے اور علاقائی تعاون پر تبادلہ خیال کیا گیا۔

صدرِ مملکت نے کہا کہ پاکستان اور چین آہنی بھائی ہیں اور ہر موسم میں ایک دوسرے کے سچے شراکت دار ثابت ہوئے ہیں۔ انہوں نے چین کی جانب سے مسلسل تعاون پر شکریہ ادا کرتے ہوئے کہا کہ سی پیک کا دوسرا مرحلہ اعلیٰ معیار کی ترقی کے نئے دور میں داخل ہو چکا ہے۔

چین کے نائب صدر ہان ژنگ نے صدر شی جن پنگ کی نیک تمنائیں پہنچائیں اور پاکستان کی دہشت گردی کے خلاف کوششوں اور علاقائی امن کے لیے کردار کو سراہا۔

ہان ژنگ نے یقین دہانی کرائی کہ چین سی پیک کے دوسرے مرحلے میں بھی پاکستان کے ترقیاتی منصوبوں میں تعاون جاری رکھے گا، جس میں ٹرانسپورٹ، انفراسٹرکچر، آئی ٹی، زراعت اور ووکیشنل تربیت کے شعبے شامل ہوں گے۔

ملاقات کے اختتام پر دونوں رہنماؤں نے باہمی اعتماد، احترام اور علاقائی خوشحالی کے وژن پر مبنی تعلقات مزید مضبوط بنانے اور عالمی و علاقائی فورمز پر قریبی تعاون جاری رکھنے پر اتفاق کیا۔