چیئرمین جوائنٹ چیفس کا برونائی دورہ،دفاعی تعاون مضبوط بنانے پر اتفاق

راولپنڈی: چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے برونائی دارالسلام کا سرکاری دورہ کیا، جس کے دوران دونوں ممالک نے دفاعی تعاون کو مزید فروغ دینے پر اتفاق کیا۔

آئی ایس پی آر کے مطابق جنرل ساحر شمشاد مرزا نے برونائی کے سلطان، وزیرِ دفاع اور کمانڈر رائل برونائی آرمڈ فورسز سے الگ الگ ملاقاتیں کیں۔ ملاقاتوں میں باہمی دلچسپی کے امور، علاقائی سلامتی اور عسکری تعاون کے فروغ پر تفصیلی تبادلہ خیال کیا گیا۔

سلطانِ برونائی نے پاکستان کی مسلح افواج کے پیشہ ورانہ معیار اور دہشت گردی کے خلاف قربانیوں کو سراہا۔

جنرل ساحر شمشاد مرزا نے موارا نیول بیس اور ڈیفنس اکیڈمی رائل برونائی آرمڈ فورسز کا بھی دورہ کیا، جہاں انہوں نے "پاکستان کا علاقائی امن و استحکام میں کردار” کے موضوع پر خطاب کیا اور مختلف ممالک کے افسران سے گفتگو کی۔

برونائی کی سول و عسکری قیادت نے پاکستان کے ساتھ دفاعی تعلقات کو مزید مستحکم کرنے کے عزم کا اظہار کیا، جب کہ جنرل ساحر شمشاد مرزا کی برونائی آرمڈ فورسز کے ہیڈکوارٹرز آمد پر انہیں گارڈ آف آنر بھی پیش کیا گیا۔