ایران کی پاک سعودی دفاعی معاہدے میں شمولیت کی خواہش

تہران، اسلام آباد : ایران نے پاکستان اور سعودی عرب کے دفاعی معاہدے میں شامل ہونے کی خواہش ظاہر کردی۔

پاکستان کے دورے پر آئے ایرانی پارلیمنٹ کے اسپیکر محمد باقر نے نجی ٹی وی سے گفتگو کرتے ہوئے کہاکہ پاکستان اور سعودی عرب کے دفاعی معاہدے میں ایران کو بھی شامل کیا جانا چاہئے۔

انہوں نے کہاکہ او آئی سی کو نیٹو کی طرز پر اسلامی ممالک کی مشترکہ فوج تشکیل دینی چاہئے،پاکستان سمیت دیگر اسلامی ممالک کو فلسطینیوں کے تحفظ اور مدد کیلئے اپنی فوج غزہ بھیجنی چاہئے،کوئی ایسا قدم نہیں اٹھانا چاہیے جس سے اسرائیلی تسلط مزید مضبوط ہو۔

اس سے قبل صدر ایف پی سی سی آئی عاطف اکرام شیخ اور وفد سے ملاقات کے موقع پر گفتگو کرتے ہوئے ایرانی پارلیمنٹ کے سپیکر محمد باقر کا کہنا تھا کہ پاکستان نے اسرائیلی جارحیت کے دوران جس طرح ایران کا ساتھ دیا کوئی ایرانی اسے بھلا نہیں سکتا، پاکستان امت مسلمہ کیلئے بہترین اثاثے کی مانند ہے۔