گھوٹکی کچے میں پولیس رینجرز آپریشن، 9 ڈاکو ہلاک، اسلحہ برآمد

سندھ کے ضلع گھوٹکی کے کچے کے علاقے رونتی میں پولیس اور رینجرز نے مشترکہ آپریشن کے دوران 9 ڈاکوؤں کو ہلاک کر دیا، جن میں شر گینگ کے اہم کارندے شامل ہیں۔ کارروائی میں جدید ڈرونز، بکتر بند گاڑیوں اور بھاری ہتھیاروں کا استعمال کیا گیا۔

ڈی ایس پی اوباڑو کے مطابق رونتی کچے میں جاری آپریشن میں 9 ڈاکو ہلاک ہوئے، جن میں سے 6 کی لاشیں تحصیل اسپتال منتقل کر دی گئی ہیں۔ گزشتہ روز ڈاکوؤں نے حملہ کر کے پولیس اہلکار سمیت 7 افراد کو قتل اور 14 کو زخمی کیا تھا۔

ایس ایس پی انور کھیتران نے بتایا کہ رونتی کے علاقے میں پرانی دشمنی کے باعث ڈاکوؤں کے دو گروہوں میں تصادم ہوا، جس کے دوران پولیس موقع پر پہنچی تو ڈاکوؤں نے پولیس پارٹی پر براہ راست حملہ کر دیا۔ حملے میں پولیس اہلکار امجد شہید جبکہ دو اہلکار زخمی ہوئے۔

پولیس اور رینجرز نے فوری جوابی کارروائی کرتے ہوئے جدید ڈرون کیمروں کی مدد سے ڈاکوؤں کے ٹھکانوں کو نشانہ بنایا۔ شدید فائرنگ کے تبادلے میں چھ خطرناک ڈاکو مارے گئے جن میں گڈی شر اور اکبر شر سمیت دیگر شامل ہیں۔

ایس ایس پی انور کھیتران کے مطابق ہلاک ڈاکوؤں کی لاشیں پولیس کی تحویل میں ہیں جبکہ ان کے قبضے سے بھاری مقدار میں اسلحہ اور دیگر سامان برآمد کیا گیا ہے۔ انہوں نے کہا کہ یہ آپریشن ڈاکوؤں کے مکمل خاتمے تک جاری رہے گا اور کچے میں جرائم کی حوصلہ شکنی کے لیے پولیس کا عزم مضبوط ہے۔

انہوں نے شہید اہلکار امجد کی فیملی کو خراجِ عقیدت پیش کرتے ہوئے کہا کہ ان کی قربانیاں رائیگاں نہیں جائیں گی۔