27 ویں آئینی ترمیم:وفاقی کابینہ کا اجلاس وزیراعظم کی صدارت میں شروع

اسلام آباد: 27 ویں آئینی ترمیم کی منظوری کے لیے وفاقی کابینہ کا اجلاس وزیراعظم شہباز شریف کی زیر صدارت آج شروع ہو گیا۔ اجلاس میں وزیر دفاع خواجہ آصف، مصدق ملک، رانا ثنا اللہ، ریاض حسین پیرزادہ، عون چوہدری، شزرہ منصب اور قیصر احمد شیخ سمیت دیگر وزراء شریک ہیں۔ وزیر قانون اور اٹارنی جنرل منصور عثمان اعوان بھی اجلاس میں موجود ہیں۔

ذرائع کے مطابق وزیراعظم شہباز شریف آذربائیجان کے شہر باکو سے ویڈیو لنک کے ذریعے کابینہ اجلاس کی صدارت کر رہے ہیں۔ اجلاس میں وزیر قانون اعظم نذیر تارڑ 27 ویں آئینی ترمیم پر بریفنگ دے رہے ہیں اور پیپلز پارٹی کی تجاویز کا جائزہ بھی لیا جا رہا ہے۔

دوسری جانب سینیٹ کا اجلاس بھی آج ہی ہوگا، جہاں بطور ضمنی ایجنڈا 27 ویں آئینی ترمیم کا مسودہ پیش کیے جانے کا امکان ہے۔ اس کے علاوہ، آئینی ترمیم کا بل سینیٹ کی قانون و انصاف کمیٹی کے سپرد کیے جانے کا امکان بھی ہے۔ ذرائع نے بتایا کہ اپوزیشن جماعتوں کی جانب سے ترمیم پیش کیے جانے کے موقع پر احتجاج کا بھی امکان ہے۔