دشمن کے 7 طیارے مارگرائے،آذربائیجان کے یوم فتح پر وزیراعظم کا خطاب

باکو: آذربائیجان کے یوم فتح کی پریڈ تقریب سے خطاب کرتے ہوئے وزیراعظم شہباز شریف نے کہا کہ معرکہ حق میں دنیا نے پاکستان کی جنگی صلاحیتیں دیکھیں، اور افواج پاکستان نے دشمن کے 7 طیارے مار گرائے۔

وزیراعظم نے تقریب میں شرکت پر فخر کا اظہار کرتے ہوئے پاکستانی عوام کی طرف سے آذربائیجان کی حکومت اور عوام کو مبارکباد پیش کی۔ انہوں نے کہا کہ پاکستان، آذربائیجان اور ترکی کے درمیان تاریخی دوستانہ تعلقات اور یکجہتی موجود ہے اور تینوں ممالک کے دل ایک دوسرے کے ساتھ دھڑکتے ہیں۔

شہباز شریف نے کہا کہ کامیابیوں کا جشن مناتے ہوئے مستقبل پر بھی نظر رکھنی ہوگی، اور امریکی صدر ڈونلڈ ٹرمپ نے عالمی سطح پر امن قائم کرنے میں اہم کردار ادا کیا۔

انہوں نے بھارت کی جارحیت کے دوران پاکستان کے ساتھ کھڑے ہونے پر آذربائیجان اور ترکی کا شکریہ ادا کیا اور معرکہ حق کی کامیابی کے جشن میں آذربائیجان کے دستے کی شرکت کو اہم قرار دیا۔