تارکین وطن کی ایک اور کشتی غرق، ایک شخص ہلاک، 90لاپتہ

پترا جایا: ملائیشیا اور تھائی لینڈسرحد پر تارکین وطن کی کشتی ڈوب گئی ۔

ملائیشین میری ٹائم کے مطابق کشتی ڈوبنے سے ایک شخص ہلاک ہو گیا،6 کو بچا لیاگیاجبکہ 90 لاپتہ  ہیں۔

ملائیشین میری ٹائم کے مطابق واقعہ تین دن قبل پیش آیا، دیگر دو کشتیوں کے بھی لاپتہ ہونے کی اطلاع ہیں،کشتی میں میانمار، روہنگیا اور بنگلہ دیشی تارکین وطن سوار تھے۔

ملائیشین پولیس کے مطابق ملائیشیا آنے والے افراد پہلے ایک بڑے جہاز میں سوار تھے،تارکین وطن کو بعد میں تین چھوٹی کشتیوں پر منتقل کیاگیا۔

برناما نیوز نے اتوار کو رپورٹ کیا کہ ملائیشیا اور تھائی لینڈ کے درمیان سمندری سرحد کے قریب ایک کشتی جس میں تقریباً 100 غیر دستاویزی تارکین وطن کو لے جایا جا رہا تھا الٹ گئی، جس میں سے چھ بچ گئے ہیں۔

ملائیشین  پولیس نے بتایا کہ بچائے گئے چھ افراد میں تین میانمار کے مرد، دو روہنگیا مرد اور ایک بنگلہ دیشی شہری شامل ہے۔ اس کے علاوہ ایک متوفی روہنگیا خاتون کی لاش سمندر میں تیرتی ہوئی دریافت ہوئی۔

پولیس چیف نے کہا کہ میانمار سے ملائیشیا جانے والا گروپ پہلے 300 افراد کو لے کر ایک بڑے جہاز پر سوار ہوا، لیکن جیسے ہی وہ سرحد کے قریب پہنچے، انہیں تین چھوٹی کشتیوں پر جانے کا حکم دیا گیا، جن میں سے ہر ایک میں تقریباً 100 افراد سوار تھے تاکہ حکام کی جانب سے پتہ لگانے سے بچ سکیں۔

انہوں نے بتایا کہ دیگر دو کشتیوں کی حالت معلوم نہیں ، تلاش اور بچاؤ آپریشن ابھی بھی جاری ہے۔