سندھ میں آبی وسائل کے شفاف استعمال کے لیے نیا فریم ورک تیار

سندھ حکومت نے صوبے میں پانی کی منصفانہ تقسیم اور مؤثر انتظام کے لیے نیا سندھ واٹر لا لانے کی تیاریاں شروع کر دی ہیں۔

اس حوالے سے صوبائی وزیر آبپاشی جام خان شورو اور سیکرٹری آبپاشی ظریف اقبال کھیڑو سے ورلڈ بینک کے وفد نے ملاقات کی، جس میں پراجیکٹ ڈائریکٹر نذیر میمن سمیت متعلقہ افسران نے بھی شرکت کی۔

ملاقات کے دوران سواٹ منصوبے اور نئے سندھ واٹر قانون کی تیاری میں پیش رفت سے متعلق مختلف امور پر تبادلہ خیال کیا گیا۔

ترجمان کے مطابق محکمہ آبپاشی اور سیڈا کے افسران پر مشتمل کمیٹی آئندہ ماہ تک قانونی مسودے کو حتمی شکل دے کر وزارتِ آبپاشی سندھ کو پیش کرے گی۔

وزیر آبپاشی جام خان شورو نے کہا کہ سندھ واٹر لا کی منظوری صوبائی کابینہ اور سندھ اسمبلی سے لی جائے گی، یہ قانون پانی کے منصفانہ استعمال، بہتر انتظام اور ماحولیاتی تحفظ کے لیے اہم پیش رفت ثابت ہوگا۔