پنجاب میں دفعہ 144 کی پابندیوں میں 7 دن کی توسیع

پنجاب میں دفعہ 144 کے تحت نافذ پابندیوں میں 7 دن کی توسیع کر دی گئی ہے۔

محکمہ داخلہ پنجاب کی جانب سے جاری نوٹیفکیشن کے مطابق ہر قسم کے احتجاج، جلسے، جلوس، ریلیاں، دھرنے اور عوامی اجتماعات پر پابندی برقرار رہے گی۔

نوٹیفکیشن میں کہا گیا ہے کہ دفعہ 144 کے تحت پابندیاں 15 نومبر تک نافذ رہیں گی۔

ان پابندیوں کے تحت 4 یا اس سے زائد افراد کا عوامی مقامات پر جمع ہونا، اسلحہ کی نمائش، لاؤڈ اسپیکر کا غیر مجاز استعمال، اشتعال انگیز، نفرت آمیز یا فرقہ وارانہ مواد کی اشاعت اور تقسیم مکمل طور پر ممنوع ہوگی۔ تاہم پابندی شادی بیاہ کی تقریبات، جنازہ اور تدفین پر لاگو نہیں ہوگی۔

سرکاری فرائض انجام دینے والے افسران، اہلکار اور عدالتیں پابندی سے مستثنیٰ ہوں گے، اور لاؤڈ اسپیکر صرف اذان اور خطبہ جمعہ کے لیے استعمال کیے جا سکیں گے۔