انکم ٹیکس ریٹرنز جمع کرنے کے حوالے سے نئی شرط عائد

اسلام آباد: فیڈرل بورڈ آف ریونیو (ایف بی آر) نے اعلان کیا ہے کہ مینول انکم ٹیکس ریٹرنز ختم کر دیے گئے ہیں اور تمام افراد کے لیے انکم ٹیکس ریٹرنز اور ودہولڈنگ اسٹیٹمنٹس صرف الیکٹرانک طریقے سے جمع کرانا لازمی ہوگا۔

ڈان اخبار کے مطابق یہ ہدایت ایس آر او 2107 آف 2025 کے تحت پیر کے روز جاری کی گئی۔ ایف بی آر نے اس ترمیم کا مسودہ گزشتہ ہفتے اسٹیک ہولڈرز سے رائے لینے کے لیے جاری کیا تھا تاکہ حتمی منظوری سے پہلے تجاویز حاصل کی جا سکیں۔

یہ ترمیم انکم ٹیکس رولز 2002 کے رول 73 کے تحت متعارف کرائی گئی ہے، جس میں نیا ذیلی قاعدہ (2DD) شامل کیا گیا ہے، جو افراد کو پابند کرتا ہے کہ وہ اپنی ریٹرنز اور ودہولڈنگ اسٹیٹمنٹس صرف الیکٹرانک ذرائع سے جمع کرائیں۔ نوٹیفکیشن کے مطابق اب مینول فائلنگ قبول نہیں کی جائے گی۔

ایف بی آر کے مطابق اس اقدام کا مقصد شفافیت میں اضافہ، ٹیکس کے ضوابط کی بہتر پاسداری، اور ملک میں ٹیکس فائلنگ کے عمل کو آسان اور مؤثر بنانا ہے۔