بنگلہ دیش کے تمام ہوائی اڈوں پر ہائی الرٹ،سیکیورٹی مزید سخت

ڈھاکا: بنگلہ دیش کی سول ایوی ایشن اتھارٹی نے ملک کے تمام ملکی و بین الاقوامی ہوائی اڈوں پر سیکیورٹی سخت کرنے کے احکامات جاری کر دیے۔ یہ اقدام خطے اور عالمی سطح پر بدلتی ہوئی سیکیورٹی صورتحال کے پیشِ نظر احتیاطی طور پر اٹھایا گیا ہے۔

اتھارٹی کے رکن برائے آپریشنز اینڈ پلاننگ ایئر کموڈور ابو سعید محبوب نے میڈیا سے گفتگو میں بتایا کہ کسی مخصوص خطرے کی اطلاع نہیں ملی، تاہم مسافروں کے تحفظ کے لیے احتیاطی اقدامات کیے جا رہے ہیں۔

سول ایوی ایشن اتھارٹی کے رکن برائے سیکیورٹی ایئر کموڈور محمد آصف اقبال کی جانب سے جاری ہدایت نامے میں تمام ایئرپورٹ ڈائریکٹرز کو سیکیورٹی پالیسی پر مکمل عملدرآمد یقینی بنانے کی ہدایت کی گئی ہے۔

سرکلر کے مطابق ایئرپورٹ کے داخلی دروازوں، حساس مقامات اور ممنوعہ علاقوں میں سخت نگرانی کی جائے گی، ٹرمینلز کے اردگرد 24 گھنٹے گشت اور سی سی ٹی وی مانیٹرنگ کا سلسلہ جاری رہے گا۔

ایئرپورٹس میں داخلہ صرف مجاز عملے، منظور شدہ مسافروں اور متعلقہ اہلکاروں تک محدود ہوگا، جبکہ عام عوام کی آمد و رفت پر مزید پابندیاں عائد کر دی گئی ہیں۔

ہدایت کے مطابق تمام مسافروں، ان کے سامان، گاڑیوں اور کارگو کی تفصیلی تلاشی لی جائے گی، جب کہ آپریشنل علاقوں میں اچانک خصوصی چیکس بھی ہوں گے۔ اسکینرز، دھماکا خیز مواد کی نشاندہی کے آلات، میٹل ڈیٹیکٹرز اور سی سی ٹی وی سسٹمز کا روزانہ معائنہ بھی لازمی قرار دیا گیا ہے۔

اتھارٹی نے گیس اور برقی لائنوں کی روزانہ جانچ اور ہوائی اڈے کی تنصیبات کے اردگرد 24 گھنٹے نگرانی کی ہدایت بھی دی ہے۔ تمام ایئرپورٹ ڈائریکٹرز سے تین ورکنگ دنوں کے اندر عملدرآمد رپورٹ جمع کرانے کو کہا گیا ہے۔

بنگلہ دیشی حکام کے مطابق یہ اقدامات بین الاقوامی شراکت داروں کے تعاون سے فضائی سیکیورٹی کے عالمی معیارات کو مزید مضبوط بنانے کے لیے کیے جا رہے ہیں، تاکہ ملکی و غیر ملکی مسافروں کے تحفظ کو یقینی بنایا جا سکے۔