اقوام متحدہ کا اسلام آباد خودکش دھماکے پر افسوس،دہشت گردی کی شدید مذمت

اسلام آباد: اقوام متحدہ کے سیکریٹری جنرل انتونیو گوتریس نے اسلام آباد میں ہونے والے خودکش دھماکے پر گہرے دکھ اور افسوس کا اظہار کیا ہے۔

اقوام متحدہ کے ترجمان کے مطابق انتونیو گوتریس نے متاثرین کے اہلِ خانہ سے تعزیت کرتے ہوئے کہا کہ وہ دہشت گردی اور تشدد کے تمام واقعات کی سخت ترین الفاظ میں مذمت کرتے ہیں۔

ترجمان نے بتایا کہ سیکریٹری جنرل نے واقعے کی مکمل تحقیقات اور دہشت گردی میں ملوث عناصر کو انصاف کے کٹہرے میں لانے کا مطالبہ کیا ہے۔

واضح رہے کہ گزشتہ روز اسلام آباد کے جی الیون کچہری کے باہر ہونے والے خودکش دھماکے میں 12 افراد شہید اور متعدد زخمی ہوئے۔

عینی شاہدین کے مطابق حملہ آور موٹر سائیکل پر سوار تھا اور اس نے پولیس موبائل کے قریب پہنچ کر خود کو دھماکے سے اڑا لیا۔ دھماکے کی جگہ سے مبینہ خودکش حملہ آور کا سر بھی برآمد ہوا۔

یہ خبر کاپی رائٹ فری ہے اور آزادانہ استعمال کے لیے دستیاب ہے۔