امریکی تاریخ کا طویل ترین شٹ ڈاؤن ختم،اخراجاتی بل منظور

واشنگٹن ،امریکی سینیٹ کے بعد ایوان نمائندگان نے بھی حکومتی اخراجات سے متعلق بل منظور کر لیا، جس کے بعد امریکہ کی تاریخ کا طویل ترین شٹ ڈاؤن اختتام پذیر ہوگیا۔

ایوان نمائندگان میں ہونے والی ووٹنگ میں 6 ڈیموکریٹس سمیت 222 ارکان نے بل کے حق میں جبکہ 2 ریپبلکن سمیت 209 ارکان نے مخالفت میں ووٹ دیا۔

امریکی میڈیا کے مطابق بل دستخط کے لیے صدر ڈونلڈ ٹرمپ کو ارسال کر دیا گیا ہے۔ اس عارضی فنڈنگ بل کی منظوری کے بعد یکم اکتوبر سے جاری شٹ ڈاؤن ختم ہوگیا، جس کے باعث کئی وفاقی محکمے اور خدمات متاثر ہوئی تھیں۔

خبر ایجنسی کے مطابق اس بل کے تحت حکومت کو 30 جنوری تک فنڈز فراہم کیے جا سکیں گے، جس سے سرکاری سرگرمیاں بغیر کسی رکاوٹ کے جاری رہ سکیں گی۔

بل کا مقصد غذائی امدادی پروگراموں کی بحالی، سرکاری ملازمین کی تنخواہوں کی ادائیگی اور ایئر ٹریفک کنٹرول نظام کو دوبارہ فعال کرنا بھی ہے۔

یہ پیش رفت اس وقت سامنے آئی ہے جب طویل مالی بحران اور فنڈز کی کمی کے باعث وفاقی اداروں کی کارکردگی بری طرح متاثر ہو رہی تھی۔ قانون سازوں کا کہنا ہے کہ اس اقدام سے حکومتی نظام میں استحکام آئے گا اور عوامی خدمات معمول پر واپس آ سکیں گی۔