سندھ حکومت کے منصوبے عوام کی زندگیوں میں بہتری لا رہے ہیں،شرجیل میمن

 

کراچی: سندھ کے سینئر صوبائی وزیر شرجیل انعام میمن نے کہا ہے کہ سندھ حکومت کے ترقیاتی منصوبے صوبے کی معیشت اور عوام کی زندگیوں میں واضح بہتری کا سبب بن رہے ہیں۔

شرجیل میمن نے اپنے بیان میں اہم منصوبوں میں کوسٹل ہائی وے، روہڑی-گڈو بیراج روڈ، مہران ہائی وے، ٹنڈو الہیار تا ٹنڈو آدم سڑک، اور سانگھڑ تا روہڑی شاہراہ کو شامل کیا اور کہا کہ یہ منصوبے علاقائی اور بین الصوبائی روابط کو مضبوط کریں گے، تجارت، زراعت اور صنعتی شعبوں کو فروغ دیں گے۔

انہوں نے مزید کہا کہ سانگھڑ، ٹنڈو الہیار، نوابشاہ اور دیگر علاقوں میں جاری منصوبے دیہی معیشت کو فعال بنانے اور نوجوانوں کے لیے روزگار کے مواقع پیدا کرنے کی پالیسی کا حصہ ہیں۔

سینئر صوبائی وزیر نے کہا کہ سندھ حکومت کی ترجیح ترقی کے عمل میں شفافیت، رفتار اور عوامی فائدہ کو یقینی بنانا ہے، فنڈز کی بروقت فراہمی اور منصوبوں کی مکمل نگرانی شہری اور دیہی علاقوں کو مساوی مواقع فراہم کرنے کے وژن کا حصہ ہے۔

شرجیل میمن نے سندھ فلڈ ایمرجنسی ریکنسٹرکشن پروجیکٹ کی بھی تعریف کی اور کہا کہ 2022 کے تباہ کن سیلاب کے بعد سڑکوں کی بحالی اور توسیع صوبے کی طویل المدتی اقتصادی ترقی کے لیے اہم ہے اور وفاق سمیت دیگر اداروں کے لیے ماڈل ہے۔