سعودی عرب: بیشتر علاقوں میں جمعہ سے پیر تک بارش کا امکان، نمازِ استسقاء کا اہتمام

ریاض: سعودی عرب کے بیشتر علاقوں میں جمعہ سے پیر تک بارش کا امکان ہے، جس کے پیش نظر موسمیات کے قومی مرکز نے شہریوں کو ہدایات پر عمل کرنے اور تازہ موسمی اطلاعات سے آگاہ رہنے کی تلقین کی ہے۔

ترجمان حسین القحطانی کے مطابق مختلف علاقوں میں بارش کے امکانات کے پیش نظر متعلقہ اداروں کی ہدایات پر عمل کرنا ضروری ہے۔

دوسری جانب خشک سالی کے خاتمے اور بارش کے لیے آج ملک بھر میں نمازِ استسقاء ادا کی جا رہی ہے۔ یہ اجتماعات خادمِ حرمین شریفین شاہ سلمان بن عبدالعزیز کے شاہی فرمان کے تحت منعقد کیے جا رہے ہیں۔

سعودی وزارتِ مذہبی امور کے مطابق نمازِ استسقاء طلوعِ آفتاب کے تقریباً پندرہ منٹ بعد ادا کی جائے گی، جس میں عوام، سرکاری اہلکار اور غیر ملکی مقیم افراد بڑی تعداد میں شریک ہوں گے۔ ملک بھر کی 12 ہزار سے زائد مساجد میں خصوصی اجتماعات کا اہتمام کیا گیا ہے، جبکہ سب سے بڑے اجتماعات مسجد الحرام مکہ مکرمہ اور مسجد نبویؐ مدینہ منورہ میں ہوں گے۔

نمازِ استسقاء سنتِ نبویؐ کے مطابق خشک سالی کے دوران ادا کی جاتی ہے، تاکہ اللہ تعالیٰ سے بارش اور رحمت کی دعا کی جا سکے۔