بابر اعظم نے سعید انور کا ریکارڈ برابر کر دیا

 

 راولپنڈی کرکٹ اسٹیڈیم میں سری لنکا نے پاکستان کو جیت کے لیے 289 رنز کا ہدف دیا۔ قومی ٹیم کے اوپنرز فخر زمان اور صائم ایوب نے 77 رنز کی شراکت کے ساتھ مضبوط آغاز فراہم کیا۔

صائم ایوب کے 33 رنز بنانے کے بعد فخر زمان اور بابر اعظم نے 100 رنز کی بہترین شراکت قائم کی، جس سے پاکستان کو سیریز میں فتح کے لیے بنیاد فراہم ہوئی۔ اس دوران فخر زمان 78 رنز بنا کر آؤٹ ہوئے۔

بابر اعظم نے ذمہ دارانہ بیٹنگ جاری رکھی اور محمد رضوان کے ساتھ شراکت میں اپنی سنچری مکمل کی۔ رضوان نے نصف سنچری بنائی۔ بابر اعظم نے دو سال سے زائد کے بعد بڑی اننگز کھیلتے ہوئے 119 گیندوں پر 102 رنز کی ناقابل شکست اننگز کھیلی، جو ان کی ون ڈے کیریئر میں 20 ویں سنچری ہے۔

بابر اعظم نے پاکستان کی جانب سے ون ڈے میں سب سے زیادہ سنچریاں بنانے کا سعید انور کا ریکارڈ برابر کر دیا۔ انہوں نے 139 میچوں کی 136 اننگز میں 37 نصف سنچریوں کے ساتھ 6,467 رنز بنائے اور اوسط 53.89 رہی۔

پاکستان کی جانب سے ون ڈے میں سب سے زیادہ سنچریاں بنانے کا ریکارڈ اب مشترکہ طور پر بابر اعظم اور سعید انور کے پاس ہے۔ دوسرے نمبر پر محمد یوسف ہیں جنہوں نے 15 سنچریاں بنائی تھیں، فخر زمان اور محمد حفیظ 11-11 سنچریوں کے ساتھ تیسرے نمبر پر ہیں۔ اعجاز احمد اور انضمام الحق نے 10-10 سنچریاں بنائی تھیں۔

ون ڈے کرکٹ میں پاکستان کی جانب سے سب سے زیادہ رنز انضمام الحق نے بنائے، دوسرے نمبر پر محمد یوسف، تیسرے نمبر پر سعید انور، چوتھے نمبر پر شاہد آفریدی اور پانچویں نمبر پر شعیب ملک ہیں۔

پاکستان نے سری لنکا کو سیریز کے دوسرے ون ڈے میں 8 وکٹوں سے شکست دے کر سیریز میں فیصلہ کن برتری حاصل کر لی۔ پہلے ون ڈے میں پاکستان نے سری لنکا کو سنسنی خیز مقابلے کے بعد 6 رنز سے شکست دی تھی۔