روس نے پاکستان اور افغانستان کے درمیان ثالثی کی پیشکش کر دی

 

روس نے پاکستان اور افغانستان کے درمیان کشیدگی کم کرنے کے لیے ثالثی کی پیشکش کر دی ہے۔ روسی وزارت خارجہ کی ترجمان ماریا زخارووا نے کہا کہ خطے میں استحکام روس اور عالمی برادری کی ترجیح ہے۔

ماریا زخارووا نے دونوں ممالک کو اہم شراکت دار قرار دیتے ہوئے کہا کہ سرحدی کشیدگی علاقائی سلامتی کے لیے خطرہ ہے اور مصالحتی کوششیں پائیدار امن یقینی بنا سکتی ہیں۔ روس نے مطالبہ کیا کہ پاکستان اور افغانستان تحمل کا مظاہرہ کریں، اختلافات بات چیت سے حل کریں اور کشیدگی بڑھانے والے اقدامات سے گریز کریں۔

یاد رہے کہ ایران نے بھی حال ہی میں پاکستان اور افغان طالبان کے درمیان ثالثی کی پیشکش کی تھی۔ ایرانی وزیر خارجہ سید عباس عراقچی نے دونوں ممالک کے وزرائے خارجہ سے رابطہ کیا اور امن و مصالحت کے لیے مدد کی پیشکش کی۔