بھارت کو جنوبی افریقہ کے خلاف پہلے ٹیسٹ میں بڑا دھچکا

کولکتہ: بھارت کو جنوبی افریقہ کے خلاف پہلے ٹیسٹ میچ میں بڑا دھچکا لگا ہے، کپتان شبھمن گل گردن کی انجری کے باعث ممکنہ طور پر باقی میچ سے باہر ہو سکتے ہیں۔

کولکتہ کے ایڈن گارڈنز میں میچ کے دوسرے روز شبھمن گل صرف 4 رنز بنا کر میدان سے باہر چلے گئے اور انہیں فوری طور پر اسپتال منتقل کیا گیا۔ بھارتی کپتان کو یہ انجری جنوبی افریقی اسپنر سائمن ہارمر کی گیند پر سویپ شاٹ کھیلنے کی کوشش کے دوران ہوئی، جس کے نتیجے میں گردن میں شدید کھچاؤ پیدا ہوا۔ ڈریسنگ روم میں ابتدائی طبی امداد کے دوران انہیں گردن پر کالر پہنایا گیا۔

بھارتی میڈیا کے مطابق بیٹنگ کے بعد شبھمن گل کو گردن میں تکلیف اور حرکت میں رکاوٹ محسوس ہوئی، جس کے بعد انہیں ہفتے کی شام سروائیکل کالر میں اسپتال لے جایا گیا۔

شبھمن گل فی الحال ڈاکٹروں کی زیر نگرانی ہیں اور انجری کی شدت جانچنے کے لیے مزید ٹیسٹ کیے جائیں گے، جس کے بعد علاج اور میچ میں دستیابی کے بارے میں فیصلہ کیا جائے گا۔