اسلام آباد ایئرپورٹ پر امیگریشن کلیئرنس میں تاخیر، مسافر سراپا احتجاج

اسلام آباد ایئرپورٹ پر امیگریشن کلیئرنس میں تاخیر کے باعث مسافروں نے احتجاج کیا۔ نیو اسلام آباد انٹرنیشنل ایئرپورٹ پر ایف آئی اے امیگریشن اسٹاف اور ترکیہ سے آنے والی پرواز TK-750 کے مسافروں کے درمیان جھگڑا ہوا، جس کے بعد دیگر مسافر بھی امیگریشن عملے کے رویے کے خلاف سراپا احتجاج بن گئے۔ سوشل میڈیا پر واقعے کی ویڈیو سامنے آنے کے بعد معاملہ مزید توجہ کا مرکز بن گیا۔ ذرائع کے مطابق مسافر سامان وصول کرنے کے بعد امیگریشن کاؤنٹرز پر پہنچے تو انہیں غیرمعمولی تاخیر کا سامنا کرنا پڑا۔ اس دوران تجمل بھٹی سمیت تین مسافروں نے فوری کلیئرنس کا مطالبہ کیا، جس پر تلخ کلامی اور جھگڑا ہوا۔ ایف آئی اے امیگریشن اسٹاف نے تینوں مسافروں کو قابو کرکے پولیس کے حوالے کیا۔ اس واقعے کے بعد دیگر مسافروں نے امیگریشن عملے کے رویے اور غیر ضروری تاخیر کے خلاف احتجاج کیا، جس سے ایئرپورٹ پر کشیدہ صورتحال پیدا ہوئی۔ تاہم بعد ازاں امیگریشن پراسس دوبارہ شروع کیے جانے کے بعد حالات معمول پر آ گئے۔