اسلام آباد میں عوام کے لیے مفت وائی فائی پوائنٹس قائم کرنےکا فیصلہ

 

اسلام آباد میں عوام کے لیے مفت وائی فائی پوائنٹس قائم کیے جائیں گے۔ نیشنل ٹیلی کمیونیکیشن کارپوریشن نے قومی اسمبلی کی قائمہ کمیٹی برائے آئی ٹی کو بریفنگ دیتے ہوئے بتایا کہ دسمبر 2025 تک شہر میں 30 مفت وائی فائی ہاٹ سپاٹ نصب کیے جائیں گے، جو شہریوں اور طلبہ کے لیے تیز رفتار انٹرنیٹ تک آسان رسائی فراہم کریں گے۔

 

سرکاری حکام کے مطابق یہ اقدام ملک میں ڈیجیٹل انفراسٹرکچر کو مضبوط بنانے کی حکومتی پالیسی کا حصہ ہے اور ہاٹ سپاٹ اسلام آباد کے اہم عوامی مقامات، مارکیٹوں اور سرکاری عمارتوں کے قریب نصب کیے جائیں گے۔ این ٹی سی نے مزید کہا کہ ادارہ ملک بھر کے 100 سے زائد شہروں میں 3 ہزار سے زیادہ سرکاری و نجی اداروں کو خدمات فراہم کر رہا ہے، جن میں سائبر سیکیورٹی سپورٹ بھی شامل ہے۔ حکام کا کہنا ہے کہ یہ منصوبہ اسلام آباد کو ٹیکنالوجی فرینڈلی شہر بنانے میں اہم قدم ثابت ہوگا۔